गोलभेँडा: धनियाँसँग मिसाएर चट्नी बनाउँदा, भात भान्सा उज्यालो म नजिक हुँदा

गोलभेँडा/टमाटर

शान्ता भट्टराई

जाडो सिजनमा फल्छु गोलभेँडा नाम
तरकारीलाई स्वादिलो बनाउने काम ।

ठाउँ अनुसार फरक नाम, रङ्ग रातो मेरो
हुनेखाने, हुुँदाखाने सबैको छु प्यारो ।

कुनै ठाउँमा तिखीरत्ने भन्छन् मलाई
जस्ले जे भने पनि गरेको छु भलाई ।

तरकारीमा मिसाउन खोजी हुन्छ मेरै
जतिपटक पकाए पनि भिटामिन धेरै ।

धनियाँसँग मिसाएर चट्नी बनाउँदा
भात भान्सा उज्यालो म नजिक हुँदा ।

सहरतिर हिजोआज गर्छन् कौशीखेती
लटरम्म फल्छु, ठाउँ चाहिँदैन त्यति ।

सलाद, सस जे मनपर्छ, बनाएर खाऊ
मेरो कमी भयो भने मुखमा आउँछ घाउ ।

करेसामै भए पनि खाने गर्नू फलाइ
भोजमा प्यात्तपित्त नफाल्नू मलाई ।

चोखो रहे, अरुले नि हुन्छ है खान
विवेकशील प्राणीले यति कुरा जान ।

यति भन्दै आमाले बोलाउनुभो कान्छा !
अचार छ गोलभेँडाको, मीठो छ भान्सा !!


(नमस्कार ! नेपालनाम्चा तपाईंको मिडिया साथी हो । र, nepalnamcha@gmail.com मा परिचय, फोटोसहित मनका अनेक कुरा, सबै कुरा पठाउनुहोला ।)

Leave a Reply

Your email address will not be published.

सम्बन्धित समाचार

Back to top button