बन्दको दिन हिरासतबाट पठाएको तस्विर

गोपाल थापाले मेसेज गरे, ‘एउटा न्युज हाल्दिनु न ।’

न्युज भनेर उनले पठाएको टेक्स्ट यस्तो थियो, ‘प्रहरीले शान्तिपूर्ण आन्दोलन विफल बनाउन काठमाडौं उपत्यकामा प्रचण्ड-माधव समूहका नेता तथा कार्यकर्ता धमाधम पक्राउ गर्न थालेको छ । प्रहरीले नेतृ अष्टलक्ष्मी शाक्य, हितमान शाक्यलाई पनि नियन्त्रणमा लिएको छ । कलंकीबाट नेतृ शाक्य पक्राउ परेकी हुन् । आज आमहड्ताल गरेको समूहका धेरै नेता-कार्यकर्तासहित प्रहरी र सशस्त्रको समूहले शाक्यलाई नियन्त्रणमा लिएको हो । यता पर्यटनका युवा नेताहरु गोपाल थापा, नवराज अमगाई, अर्जुन सिम्खडा, भगवान थापा साथै यूबा नेता उत्तरकुमार श्रेष्ठ, संकल्प श्रेष्ठ, बाबूराम देवकोटालगायत थुप्रै कार्यकर्ताहरु बिहानै नयाँबजारबाट पक्राउ परेका छन् । अष्टलक्ष्मी शाक्यलगायत पक्राउ नेता कार्यकर्तालाई प्रहरीले महाराजगंजमा हिरासतमा राखेको छ ।’

उनले थपे, ‘अहिले हामी रानीबारीमा छौं । बिहान ५ः३० बजे सोह्रखुट्टेमा नारायणकाजी दाईलाई वेट गरेको । हामी बाटोमा हिँडिरहेका थियौं । हिंडिरहेको ठाउँबाट जबरजस्ती हामीलाई समातियो । सुरुमा सोह्रखुट्टे लगियो । अनि त्यहाँबाट जबरजस्ती यहाँ ल्याइयो ।’

उनले महानगरीय प्रहरी शिक्षालय, महाराजगञ्ज, काठमाडौबाट त्यहीँ खिचेका केही तस्विर पनि पठाए । यहाँ प्रकाशित तस्विर तिनै हुन् ।