खोजिरहने छु म बुद्धलाई
कविता
रूपा थापा
नुवाकोट ।
नियाल्नु छ मलाई त
आफैभित्र एउटा बुद्धलाई ।
त्यागेर सारा यो मोहको जालोलाई
आफैभित्र बलिरहेको
सारा अहङ्कारलाइ जलाएर ।
सोध्नु छ आफैलाई
म हिँडेको बाटोले
पुर्याउँछ कि चोट कतै
कोमल ती फूलहरुलाई ।
यहाँ फूलको सुगन्धमा
बारुदका गन्ध भर्नेहरुले
अशान्तिका बीजहरुलाई छरेर
नबनाउन घायल फेरि कुनै बचेराहरुलाई ।
म निशव्द बनेर
यो कोलाहालमा जब नियाल्न थाल्छु
आफ्नै आँखाभित्रको
एउटा शान्त ताललाई ।
खोज्नु छ मलाई त यहाँ
म भित्रै एउटा सत्यता
भेट्नु छ मलाई त बुद्धलाइ यँहा
आफ्नै आत्माभित्र ।
मेरो आँखाभित्र नभरिउन् कैले
इर्ष्याका ती छालहरुले
मेरो मनभित्र नडुलोस् कैले
ती लोभी भमराहरुले ।
जबसम्म भेटिने छैन
आफैभित्र एउटा बुद्धलाई
जबसम्म अपनाउन सक्दिन म
आफैभित्र एउटा बुद्दत्वलाई ।
खोजिरहने छु म त्यसैगरी
आफैभित्र एउटा बुद्धलाई ।
…
(तपाईं पनि आफ्ना कविता, कथा, लघुकथा, मुक्तक दैनिकी, संस्मरण, लेख आदि नेपालनाम्चाको इमेल nepalnamcha@gmail.com मा पठाउनु होला ।)
