ढिलो चाँडो त्यस्तै हो, देश उस्तै हो
सत्र हाइकु
युवराज घलेभाइ
गान्तोक, सिक्किम, भारत
छेपाराहरु
रङ फेरिरहन्छन्
रङ्गीन हुन ।
ठेउकेहरु
उरन्ठेउला हुन्छन्
नदाएसम्म ।
नजाने बाटो
जानीजानी दौँडिदा
अन्तै पुगिन्छ ।
अर्कै आएछ
झन्डा हल्लिए पनि
गाडी हल्लिन्न ।
अझै बाँकी छ
समाप्तिको भाषण
मायाको चिनो ।
बार्दली बिना
घरै नबन्ने भो’त
‘नो डिजाइन’ ।
डेरा सर्नुछ
ढिलो चाँडो त्यस्तै हो
देश उस्तै हो ।
निम्तो आएछ
मुख मिठयाउँदै छन्
दौरा किन्दै छन् ।
ओठ पोल्छ कि
खिचडी पाक्दैछ रे
अगुल्टो तान्दै ।
जोड-घटाउ
विश्वास अविश्वास
हिसाब मिल्यो ।
परिवर्तन -१
आक्रोशित भनाइ
मान्छेको बोली ।
परिवर्तन -२
समयको हुरी हो
सत्यता बोल्छ ।
परिवर्तन -३
निरङ्कूश शासन
पल्टा खान्छ अवश्य ।
ठूलो समुन्द्र
नूनै नूनको पानी
भो परिवर्तनको व्यवस्थापन ।
टालेको मन
दिनभरि खप्छु
रात बिरोल्छु ।
तिमी आएनौ
गुराँस किन फुल्थ्यो
ओसिलो याद ।
अनन्त यात्रा
तिमी छैनौ साथमा
चिसो कल्पना ।
…
(नमस्कार ! नेपालनाम्चा तपाईंको मिडिया साथी हो । र, nepalnamcha@gmail.com मा परिचय, फोटोसहित मनका अनेक कुरा, सबै कुरा पठाउनुहोला ।)
