कसको भाग्य फुटेको छ, को हो भाग्यमानी, लेखाजोखा कति गर्नु, कति कुराकानी

युवराज घलेभाइ
गान्तोक, सिक्किम, भारत

कसको भाग्य फुटेको छ, को हो भाग्यमानी
लेखाजोखा कति गर्नु, कति कुराकानी ।

जिन्दगीको एउटा पाटो सधैं भिज्ने गर्छ
थाहा छैन भिजाउने त्यो, आँशु हो कि पानी ।

जति हाँस्न खोज तिमी, जति ढाँट्न खोज
तिम्रो पीडा खोली दिन्छ भिजेको सिरानी ।

हृदयको कुनाभित्र, लुकेकी पो छौं कि ?
या त बनी बसेकी छौं, आँखाभित्र नानी ।

पीर बोकी थिर मन कहाँ हुनसक्छ ?
कता – कता बरालिने बसि सक्यो बानी ।

थाहै नपाई यात्राभरि केही बिराएँ कि
भए जस्तो लागेेको छैन गल्ती जानी – जानी ।

…
(नमस्कार ! नेपालनाम्चा तपाईंको मिडिया साथी हो । र, nepalnamcha@gmail.com मा परिचय, फोटोसहित मनका अनेक कुरा, सबै कुरा पठाउनुहोला ।)