कुखुरी काँ, बासी भात न खा

बालकथा

सागर ‘मणि’ थापा

जनक बिहान आफ्नो ओछ्यानबाट उठ्यो । लामो हाइ काढ्यो । ऊ आँगनमा पुग्यो । उसले रातो घाम उदाएको देख्यो । आँगनवरिपरिका रूखहरूमा चराचरुङ्गीहरू चिरबिर चिरबिर गर्दै रमाइरहेका थिए । जनकले खोरबाट कुखुराहरू छाडिदियो । ठूलो सिउर भएको रातोभाले पर्खालमा चढेर गर्धन तन्काई तन्काई बास्न थाल्यो, ‘कुखुृरी काँ..आँ..आँ…, बासी भात न खा..आ..आ…।’

माथि आकाशमा एउटा चील उडिरहेको थियो । त्यसले कुखुरीको चल्लो टिप्ने दाउ गरिरहेको थियो । तर रातोभालेले ती चल्लाहरूको रेखदेख गरिरहेको हुँदा चील निराश भयो ।

जनक र निर्मल जनककै कोठामा लेखपढ गर्न लागेका थिए । उनीहरूको घरमा बिजुलीबत्ती थिएन । लालटिनको प्रकाशले काम चलाउँदै थिए । यस्तैमा त्यो कोठामा दुईवटा मुसा पसे । तिनीहरूले दराजको किताब तानेर बाहिर लैजान थाले ।

निर्मलले चिच्याएर भन्यो, ‘जनक, मुसा, मुसा…।’

जनकले हातकै किताबले झटारो हिर्कायो । तब त मुसाहरू कुलेलम ठोके ।

अर्को दिन

बिहान जनककी आमा गोठमा गाई दुहुन लागेकी थिइन् । जनक र निर्मल पनि आइपुगे । निर्मलले गाईको पुच्छरमा समाएको मात्र थियो, गाई दच्किएर लात्ता झट्का¥यो । सन्जोगबश जनकलाई लागेर गोबरमा पछारिन पुग्यो । पहिले त निर्मललाई रमाइलो लागेर हाँस्यो । तर पछि साथीसँग माफी माग्दै साबुन-पानीले गोबर पखालिदियो ।

केही समयपछि जनक र निर्मल गाईको बाच्छो र बाख्राको पाठोसँग खेल्न थाले । वातावरण रमाइलो थियो । जनकले पाठोलाई कलिलो घाँस खान दियो । निर्मलचाहिँ स्याउला देखाउँदै बाच्छोसँग खेल्न थाल्यो ।

आमाले जनक र निर्मललाई दूध र रोटी खान दिँदै भनिन्, ‘तिमीहरू यो खाजा खाएर पढ्न जाओ । मचाहिँ खाना पकाउन भान्छामा जान्छु ।’
दुवै केटाहरू खाजा खाएर कोठाभित्र पसे । केही समय पढेपछि खाना खाने बेला भयो । खाना खाइवरी दुवैजना स्कुल जान तयार भए ।

जनकले भन्यो, ‘तपाईँ पनि स्कुलमा जानपर्छ है आमा । आज त अभिभावक दिवस हो नि ।’

आमाले भनिन्, ‘हुन्छ । म घरको धन्दा सकेर आउँछु । तिमीहरू जाँदै गर ।’

स्कुलमा जनक र निर्मलका अभिभावकहरू पनि उपस्थित भए । प्रधानाध्यापकको हातबाट जनक र निर्मलले पनि पुरस्कार थापे ।

त्यही रातको घटना हो । कोठामा जनक एक्लै सुतिरहेको थियो । त्यसै बखत चार—पाँचवटा मुसाहरू आएर जनकलाई सताउन थाले । ऊ हैरान भएर चिच्यायो, ‘हे भगवान् ! म के गरूँ यी मुसाहरूलाई ?’

फेरि अर्को दिन

छोराको समस्या हल गरिदिन आमाले एउटा बिरालो ल्याइदिइन् । त्यो बिरोलो पाएर जनक दङ्ग प¥यो । जनकलाई राति उसको बिरालोले उठाइदियो ।

जनक अचम्म मान्दै करायो, ‘ओ माइ गड् ! एकै पटकमा तीन-तीनवटा मुसा मारेको तैँले ?’

जनक हर्षले बेसरी चिच्यायो । ऊ नाच्न थाल्यो । उसकी आमा ‘के भो के भो’ भन्दै कुदेर आइपुगिन् । त्यहाँको दृश्य देखेर उनी पनि छक्क परिन् !

…

(नमस्कार ! एउटा कुरा भनौं है, तपाईं पनि लेख्नु न । जीवन र जीवनसँग सम्बन्धित कुनै पनि कुरा लेख्नु । नेपालनाम्चा तपाईंको मिडिया साथी त हो । र, nepalnamcha@gmail.com यसको इमेल हो । यही इमेलमा आफ्नो परिचय, फोटोसहित आफ्ना मनका अनेक कुरा, सबै कुरा पठाउनुहोला ।)