माया अतित भैदिन्छन् भावनाले धोखा पाएपछि
अलि अलि माया दिनु
ज्योति पाख्रिन
अलि अलि माया दिनु
हृदयको भित्रि तहबाट
पोखिदिउँला वेदनाहरू
आँसु झार्दै गहबाट ।
भावनामा बगिनहिँड्नु प्रिय
मुटु सार्है सार्है दुख्छ
पलभरमै आँसु पनि
खोली बनी बग्ने रैछ ।
झुठो सपना नदेख्नु प्रिय
क्षणभरमै टुटी जान्छ
लाख कोशिश गरे पनि
छुट्ने माया छुटी जान्छ ।
पिडाहरू बल्झिदिन्छन्
मुटुले चोट खाएपछि
माया अतित भैदिन्छन्
भावनाले धोखा पाएपछि ।
मैन जस्तै आफैभित्र
खिईंदै जलिरहनु पर्छ
धिपधिपे दियोको उज्यालोसँगै
पल पल मरिरहनु पर्छ ।
अलि अलि माया दिनु
हृदयको भित्रि तहबाट
पोखिदिउँला वेदनाहरू
आँसु झार्दै गहबाट ।
…
(नमस्कार ! एउटा कुरा भनौं है, तपाईं पनि लेख्नु न । जीवन र जीवनसँग सम्बन्धित कुनै पनि कुरा लेख्नु । नेपालनाम्चा तपाईंको मिडिया साथी त हो । र, nepalnamcha@gmail.com यसको इमेल हो । यही इमेलमा आफ्नो परिचय, फोटोसहित आफ्ना मनका अनेक कुरा, सबै कुरा पठाउनुहोला ।)
