छ-छैन माया नियतले सहजै बताउँदो रै’छ

गजल

सुशीला शर्मा
दमक, झापा

मायाले मान्छेलाई एकहोरो नै बनाउँदो रैछ,
मनको घाऊ बनेर डाहाले धेरै सताउँदो रैछ ।

बिर्सेर पनि गर्दिन भूल अरूको भर पर्दिन भन्थे,
मायाको आभास समयले आफै गराउँदो रैछ ।

मुहारमा मात्र देखिन्छ हेर्दा हाँसो र खुसी,
भित्र भित्रै मायाले साह्रै तड्पाउँदो रैछ ।

भूलेर माया संसार सारा नियाली हेर्छु,
छ छैन माया नियतले सहजै बताउँदो रैछ ।

टाढै जावोस भागेर होस या छोडेर होस,
छ भने माया छायाले सधैं पछ्याउँदो रैछ ।

…
(एउटा कुरा भनौं है, तपाईं पनि लेख्नु न । जीवन र जीवनसँग सम्बन्धित कुनै पनि कुरा लेख्नु । नेपालनाम्चा तपाईंको मिडिया साथी त हो । र, nepalnamcha@gmail.com यसको इमेल हो । यही इमेलमा आफ्नो परिचय, फोटोसहित आफ्ना मनका अनेक कुरा, सबै कुरा पठाउनुहोला ।)