साइकल जीवन जस्तै हो, सन्तुलन मिलाएन भने लडिन्छ

नेपालनाम्चाले सुरु गरेको नयाँ स्तम्भ ‘साइकल’मा सदा साइकलमा हिँड्ने बाँके जिल्ला साइक्लिङ संघका अध्यक्ष गगन थापा ।

साइकल चलाउन थाल्नुको पहिलो कारण के थियो ? आवश्यकता, रहर कि स्वास्थ्य ?
सुरुमा त आवश्यकता नै थियो । तर आवश्यकताबाट सुरु भएको यो यात्रा क्रमशः रहर बन्यो र आज आएर स्वास्थ्य, अनुशासन र जीवनशैली सबैसँग जोडिएको छ। अहिले साइकल मेरो साधन मात्र होइन, साथी र गुरु जस्तै भएको छ ।

आजको जीवनशैलीमा साइकलको महत्व तपाईं कसरी देख्नुहुन्छ ?
आजको व्यस्त, प्रदूषित र तनावपूर्ण जीवनशैलीमा साइकल एक समाधान हो । यसले स्वास्थ्य जोगाउँछ, वातावरण बचाउँछ र आत्मनिर्भर जीवनशैली सिकाउँछ । छोटो दूरीका लागि साइकल नै सबैभन्दा प्रभावकारी साधन हो भन्ने मेरो विश्वास छ ।

साइकल चलाउँदा तपाईंले पाउने सबैभन्दा ठूलो मजा के हो ?
स्वतन्त्रता । साइकल चलाउँदा म समय, भीड र तनावबाट मुक्त हुन्छु । आफ्नै गतिमा यात्रा गर्ने, बाटोको हावा महसुस गर्ने र आफूलाई आफूले जित्ने त्यो अनुभूति नै सबैभन्दा ठूलो मजा हो ।

पहिलो साइकलयात्राको अनुभव कस्तो थियो ? अझै सम्झन लायक छ ?
धेरै सामान्य थियो तर भावनात्मक रूपमा निकै गहिरो । थकाइ, डर र उत्साह सबै मिसिएको थियो । त्यो यात्राले नै मलाई सिकायो- गन्तव्यभन्दा यात्रा महत्वपूर्ण हुन्छ । त्यसैले आज पनि त्यो यात्रा सम्झँदा आत्मबल बढ्छ ।

साइकलले तपाईंको शारीरिक र मानसिक स्वास्थ्यमा के-कस्ता परिवर्तन ल्यायो ?
शारीरिक रूपमा म सक्रिय र ऊर्जावान भएँ । मानसिक रूपमा आत्मविश्वास, धैर्यता र सकारात्मक सोच बढ्यो । जीवनमा समस्या आए पनि साइकलले मलाई अघि बढ्न सिकायो ।

नेपालमा साइकलमैत्री वातावरण कति छ जस्तो लाग्छ ? के-के सुधार आवश्यक छन् ?
अहिले नेपालमा साइकलमैत्री वातावरण अझै पर्याप्त छैन । सुरक्षित लेन, जनचेतना, नीतिगत समर्थन र स्थानीय तहको सक्रियता आवश्यक छ । यदि राज्य र समाजले सँगसँगै काम गर्‍यो भने ठूलो परिवर्तन सम्भव छ ।

साइकल चलाउँदा भोगेको कुनै रमाइलो, चुनौतीपूर्ण वा प्रेरणादायी घटना साझा गर्न चाहनुहुन्छ ?
व्यवसायिक तनावका कारणले जीवनमा धेरै कठिनाई आए, आर्थिक कठिनाइ धेरै आए । तर त्यही बेला साइकल नै मेरो साहस बन्यो । कठिन अवस्थामा पनि साइकल चढेर यात्रा गर्दा मैले हार नमान्ने शक्ति पाएँ- त्यही नै मेरो सबैभन्दा ठूलो प्रेरणा हो ।

साइकलयात्राका लागि तपाईंलाई सबैभन्दा मन पर्ने ठाउँ कुन हो र किन ?
नेपालगन्ज नै हो । यस वरिपरिका ग्रामीण बाटा र खुला मैदानहरू । यहाँको माटो, मानिस र सादगीले मलाई आफ्नो जरा सम्झाउँछ । यहीँबाट मेरो यात्रा सुरु भएको हो ।

साइकललाई जीवनसँग तुलना गर्नुपर्दा, तपाईंका लागि यसको अर्थ के हुन्छ ?
साइकल जीवन जस्तै हो- सन्तुलन मिलाएनौं भने लडिन्छ, निरन्तर पेडल नघुमाए अगाडि बढिँदैन, र धैर्य राखे गन्तव्य अवश्य पुगिन्छ ।

नयाँ पुस्तालाई साइकल चलाउन प्रेरित गर्न चाहनुहुने एक सन्देश के होला ?
मोबाइल र मोटरबाट केही समय टाढा बसेर साइकलसँग नजिक हुनुहोस् । साइकलले तपाईंलाई स्वास्थ्य मात्र होइन, आत्मविश्वास, अनुशासन र जीवन बुझ्ने दृष्टिकोण पनि दिन्छ ।

…
(नमस्कार ! नेपालनाम्चा तपाईंको मिडिया साथी हो । र, nepalnamcha@gmail.com मा परिचय, फोटोसहित मनका अनेक कुरा, सबै कुरा पठाउनुहोला ।)