‘धरहरा’मा कम्युनिस्ट

कविता

प्रकाश दुलाल

जनता रोग र भोकले आक्रान्त हुँदा
पार्टी र सरकार खै भन्दै छन् रे !

हामी यहाँ छौं
समृद्धिको नारामा छौं
काठमाडौंको धरहरामा छौं
पार्टी फुटाउन व्यस्त छौं
सरकार बचाउन मस्त छौं ।

प्रदेश सांसदलाई भेडीगोठमा रुपान्तरण गरेर
हाम्रो ईसारामा मुख्य गोठाला
र, तिनका मुखिया फेर्न अभ्यस्त छौं ।

हामी कमिसनको मोल मोलाईमा छौं
आपसी जुधाईमा छौ ।

कर्णाली, गण्डकी र लुम्बिनीतिरको
खबर सुन्नु भएन ?
कारवाही र वाहवाहीको परिभाषा बुझ्नु भएन ?

हामीलाई अक्सिजन खै भनेर नसोध्नु
औषधी ल्याउँछन् कि भनेर बाटो नहेर्नु
टिभीमा हेर्नु, समाचारमा पढ्नु
तपाईँका गुनासा सुन्न र बुझ्न
हामीलाई फुर्सद छैन
जनताले हामी हराएको सुचना जारी नगरुन् भनेर
हामी सांसद मोलमोलाईमा छौं, किनबेचमा छौं ।

हामी कहाँ छौं भनेर
अझै पनि ठम्याउन सक्नु भएनछ ।
त्यसैले
हामी कहाँ छौं र के गर्दै छौं भनेर देखाउन
बैशाख २७ मा विश्वास/अविश्वासको
खेल आयोजना गरेका छौं ।

कोरोना त्रासबाट मुक्त हुन
हाम्रो खेल हेर्नु र सुन्नु ।
लाज लागे आफ्नै आँखा थुन्नु ।
हामीलाई लाज-घिन
धर्म-अधर्म वेपरवाह छ
किनभने,
हामी नास्तिक हौं
हामी कम्युनिस्ट हौं
भौतिकवादी हौं, अवसरवादी हौं ।

सत्ता र सम्पत्ति सत्य
र, जगत् मिथ्या ठान्छौं
र, त सार्वभौम संसदलाई पंगु बनाउन
सांसद खरिदबिक्रीमा छौं ।
हामी यहाँ छौं ।

बुधबार २२ बैशाख २०७८, काठमाडौं ।

(तपाईं पनि आफ्ना कविता नेपालनाम्चाको इमेल nepalnamcha@gmail.com मा पठाउनु होला ।)