मैतीदेवीमा महाकवि सङ्ग्रहालय

महाकवि लक्ष्मीप्रसाद देवकोटाको मैतीदेवीस्थित निवास ‘कविकुञ्ज’लाई नेपाल प्रज्ञा–प्रतिष्ठानले सङ्ग्रहालयका रूपमा निर्माण गर्ने खबरले मैतीदेवीका स्थानीय उत्साहित भएका छन् ।

मङ्गलवार नेपाल प्रज्ञा–प्रतिष्ठानका कुलपति गङ्गाप्रसाद उप्रेती, उपकुलपति डा. जगमान गुरुङ, सदस्य सचिव प्रा. जगत्प्रसाद उपाध्याय लगायतका प्राज्ञ परिषद्का सदस्यहरूसँग भेटेर स्थानीय बासिन्दाले उक्त कुराको स्वागत गर्दै उत्साह प्रकट गरेका हुन् । सो अवसरमा स्थानीयहरूले मैतीदेवीमा बन्न लागेको महाकवि देवकाटा सङ्ग्रहालय स्थानीयका लागि गौरवको कुरा भएको धारणा व्यक्त गर्दै सङ्ग्रहालय निर्माणका बारेमा विस्तृत जानकारी हासिल गरेका छन् ।

महाकवि देवकोटा सङ्ग्रहालय निर्माण योजनाका सम्बन्धमा प्रकाश पार्दै कुलपति उप्रेतीले महाकविको जीर्ण अवस्थामा रहेको मैतीदेवीस्थित उक्त निवासलाई प्रधानमन्त्री केपी शर्मा ओलीको निर्देशनमा संस्कृति, पर्यटन तथा नागरिक उड्डयन मन्त्रालयले गत वर्ष नै खरिद गरेर नेपाल प्रज्ञा–प्रतिष्ठानलाई स्वामित्व हस्तान्तरण गरी सङ्ग्रहालय निर्माणका लागि सुम्पिएको बताए । उनले सङ्ग्रहालय निर्माणका लागि डिपिआर तयार गरी सरकारसँग आवश्यक बजेट माग गरिएको जानकारी गराए । कुलपतिले भने, ‘बजेटको व्यवस्था हुनासाथ हामी निर्माण प्रक्रियालाई द्रुत गतिमा अगाडि बढाउनेछौँ । सकेसम्म अर्को वर्षको महाकवि देवकोटा जन्मजयन्तीमा उद्घाटन गर्ने गरी काम गर्ने लक्ष्य लिएका छौँ ।’

प्रधानमन्त्रीका परराष्ट्र मामिला सल्लाहकार डा. राजन भट्टराईले महाकवि देवकोटा सङ्ग्रहालयलाई प्रधानमन्त्रीले राष्ट्रको गौरवमय योजनाकै रूपमा लिएको बताउँदै निर्माणका लागि आवश्यक बजेट यथाशिघ्र निकासा हुने विश्वास दिलाए । उनले यस्तो गौरवको आयोजनालाई स्थानीय बासिन्दा र सरोकार पक्ष सबैले समवन्य र सहजीकरण गरी निर्माणका लागि सहज वातावरण बनाइदिन आग्रह गरे ।

भेलामा सहभागी स्थानीयहरू तेजप्रसाद ढकाल, रामराज कँडेल, भीमा कार्की, सुरेन्द्र श्रेष्ठ, कृष्णभक्त खड्गी, पुरुषोत्तम दाहाल, विश्वराज रेग्मी, मदनराज श्रेष्ठलगायतले महाकवि देवकोटाको निवासलाई मौलिकता झल्किने गरी छिटो निर्माण गर्नुपर्नेमा जोड दिँदै स्थानीयहरूका तर्फबाट आफूहरूले पूर्णरूपमा समन्वय र सहजीकरण गर्ने प्रतिबद्धता प्रकट गरे ।

स्थानीयहरूका जिज्ञासाको जवाफ दिने क्रममा कुलपति उप्रेतीले स्थानीयको सहयोग अत्यन्तै आवश्यक रहने र एउटा उपसमिति नै बनाएर काम अगाडि बढाउने बताए । यो देशकै पहिलो र गर्वको विषय भएकोले सो संरचना निर्माणदेखि सञ्चालनसम्म सहयोग गर्न उनले स्थानीयलाई आग्रहसमेत गरे ।

Leave a Reply

Your email address will not be published.

सम्बन्धित समाचार

Back to top button