कान्जी हाउस होइन, गौशाला आवश्यक

स्मृती राणा

कान्जी हाउस भनेको वधशाला हो । कान्जी हाउसलाई पशु हत्या केन्द्र भन्दा फरक नपर्ला । कान्जी हाउसमा सरकारले घेराबन्दी गरेर गाईहरुलाई थुन्ने गर्दछन् । नेपालमा नगरको विकाससँगै कान्जी हाउसको संख्या बढ्दै गइरहेको छ ।

मानिसहरु शहरीया आकर्षण देखेर आफ्नो घरको गौमाताहरूको दाम्लो खोली सडकमा लगेर छोडिदिन्छन् । गाई घरपालुवा जनावर भएको हुनाले र मान्छेसँग प्रेम भएको कारणले गौमाता फेरि फर्केर बस्ती नजिकको सडकमा बस्ने गर्दछन् । जसको कारण सडक दुर्घटना बढ्दै गइरहेको छ र सडकमा दुर्गन्ध आदि बढेको छ । अहिले सबैभन्दा ठूलो चुनौती भनेको सडकमा छोडेको छाडा चौपाया हो ।

अहिले देशभरीका स्थानिय गाईहरु हेलाका पात्र बनेका छन् । चाडपर्वमा गाई चाहिने ,नागपञ्चमीमा गाईकै दूध चाहिने, मर्दा, जन्मँदा गौ दान आदि गर्ने, हरेक शुभ र पितृ कार्यमा पञ्चगव्य चाहिने हाम्रो समाज अहिले गाईको महत्व नबुझेर रोगी र संस्कारहिन बन्दै गइरहेको छ । गाईलाई गौशालामा गएर एक बोरा चोकर शुध्द खुवाउन सक्दैन् हाम्रो समाजले ।

गौ संरक्षण अरु निर्जिव वस्तुको जस्तो सजिलो नभए पनि असम्भव चाहिँ छैन । गौ संरक्षण एक व्यक्तिबाट मात्र सम्भव देखिन्न । यसको लागि व्यापक जनसहभागिताको आवश्यकता छ । व्यवस्थापनलाई चुस्त बनाउन र गौशालालाई दिगो संचालन गर्न इमान्दार, सक्रिय, सामाजिक भावनाका व्यक्तिहरुलाई समेटेर अगाडि बढ्नु पर्दछ । गौ माता स्वयम् देव मन्दिर हुनुहुन्छ, जसको शरीरमा तेतीस कोटि देवी देवताको बास रहेको छ, जसलाई वैज्ञानिकहरुले पनि हिँड्दोडुल्दो औषधालय भनेर भन्ने गर्दछन् । यति धेरै महिमा बोकेकी गौमातालाई हरेक क्षेत्रमा कान्जी हाउस होइन, राम्रो व्यवस्थित गौशालाको आवश्यकता रहेको छ।

देशभरिका प्रत्येक निर्वाचन क्षेत्रमा नेपाल सरकारको निगरानीमा र सरकारी व्यवस्थापनमा सञ्चालन गरिएमा कृषि क्षेत्रमा ठूलो सेवा पुग्दथ्यो र यसो भएमा गौवंशको रक्षा पनि हुने थियो ।

…
(नमस्कार ! नेपालनाम्चा तपाईंको मिडिया साथी हो । र, nepalnamcha@gmail.com मा परिचय, फोटोसहित मनका अनेक कुरा, सबै कुरा पठाउनुहोला ।)