माया सुस्तरी सुस्तरी लठ्ठिएसरी मात्तिएसरी

कविता

खगेन्द्र भट्टराई
दमक -१, झापा ।

मायाको मार्ग तेर्सैैतेर्सो
सम्झँदो रहेछु म
मनले नापेको कहाँ हुनु
दम्स्याइलो दम्स्याइलो
माया त थुम्का थुम्की
माया त गैह्री खोल्सी
माया त अक्करे भीर
चढिनसक्नु हिमाल
फेरि,
माया त शीतल बतास
नाप्छु आँखाले
कल्पन्छु मनले
माया त रुवा बतास
कहाँको हुनु माया त
हुरि बतास
रापीलो ताप
दर्के झरी
बेतोडको हुन्डरी
फेरि,
माया सुस्तरी सुस्तरी
लठ्ठिएसरी, मात्तिएसरी
माया त सुस्तरी सुस्तरी ।

(सत्यकथा, कथा, लघुकथा, कविता, मुक्तक, दैनिकी, संस्मरण, लेख आदि नेपालनाम्चाको इमेल nepalnamcha@gmail.com मा पठाउनु होला ।)