मैले बल्ल आज तलाईं चिनेँ

पेशल आचार्यका सात छोक

१
उचाइ

ऊ धरहरा चढ्यो
र आफू चढेको भ¥याङ्
तलै झारिदियो
विपक्षीहरू हेरेको हेरेई भए !

२
शैली

विरोधीहरूले
उसलाई तथानाम गाली गरे
ढुङ्गा हाने
जवाफमा
उसले विरोधीले हानेका
सप्पै ढुङ्गाको सिँढी बनाएर
फेरि पनि अझ माथि पुग्यो ।

३
शिक्षा

असी काटेका बाबुले
साठी कटेको
छोरोलाई
अमिलो मुख पारेर भने
‘मैले बल्ल आज तलाईं चिनेँ !’

४
सीप

बेरोजगार छोरो
काम नपाई घर बस्छ
उत वृद्ध बाबुलाई
प्रौढ कक्षा पढ्न बोलाइन्छ !

५
अवस्था

उर्वरशील खेतबारी बाँझैँ राखेर
राष्ट्रिय गीतगाउँदै
मेरो देशका लाखौं युवाहरू
आफू भेडो बनेर
अबरमा
भेडा चराइरहेछन् ।

६
दृष्टि

जूनको उज्यालोमा
उसलाई देखेँ
ऊ त सर्वाङ्ग नाङ्गी रहिछे !

७
जिज्ञासा

पढेर
रूख चढेर
र बाटो हिँडेर
एउटा मानिसले
जीवनमा कहिले सक्छ हँ ?

…
(नमस्कार ! एउटा कुरा भनौं है, तपाईं पनि लेख्नु न । जीवन र जीवनसँग सम्बन्धित कुनै पनि कुरा लेख्नु । नेपालनाम्चा तपाईंको मिडिया साथी त हो । र, nepalnamcha@gmail.com यसको इमेल हो । यही इमेलमा आफ्नो परिचय, फोटोसहित आफ्ना मनका अनेक कुरा, सबै कुरा पठाउनुहोला ।)