सुन्दर छ कोब्रा तिम्रो मनोहारी रूप !

टुक्का: नागपञ्चमी

श्रीकृष्ण शर्मा

१

मूल ढोकामाथि टाँस्नू नाग चित्र
डर हुन्न टोक्ने पस्ने घरभित्र ।

२

अनन्त, वासुकी, पद्य, महापद्य, तक्षक
कुलीर, कर्कट, शङ्ख हुन् जीवन रक्षक ।

३

वर्जित छन् केही कुरा मान्नुपर्छ आज
हलो जोत्ने अनि खन्ने नगर्नू है काज ।

४

पायस पकाई शिव अनि नागलाई दिनू
पर्ने छैन चट्याङ घरमा वरदान लिनू ।

५

पूजा गरे बन्छन् यिनै हाम्रा रक्षक
बुझ्नू नाग नै हुन् परिक्षित भक्षक ।

६

सुन्दर छ कोब्रा तिम्रो मनोहारी रूप
नागलाई पूजा गर्दा टाढा बाल्नू धूप ।

७

नागबिच्छी विषालु छन् डस्न सक्छन् हेर
घर वरिपरि झाडी पाल्नुहुन्न हेर ।

८

अष्ट नाग पूजे अग्नि भय हुँदैन ए साधक
यिनै हाम्रा देवीदेउता पुजे बन्दैनन् बाधक ।

९

सर्पले त एकैचोटि डस्दैन लगातार
खतरा हुन्छन् दुष्ट साथी डस्छन् बारम्बार ।

१०

शङ्खचक्र, गदापद्य चन्द्रसूर्य साथमा
माछा पनि सँगै पूजे दर्द हुन्न माथमा ।

११

बुझ नागलाई दूध किन चढाउँछन् शिर
यसको गन्ध पाएमा भाग्छन् पर्ने छैन पीर ।

१२

घरका ढोका, कोठाचोटा सबै नागमय
शुद्ध मनले पूजेदेखि हुन्न सर्पभय ।

१३

सलल बगेर त्रास भर्न सक्छ यही हुँदा
नागलाई पूज्छन् परन्तु क्यै वास्ता छैन रुँदा ।

….

(नमस्कार ! एउटा कुरा भनौं है, तपाईं पनि लेख्नु न । जीवन र जीवनसँग सम्बन्धित कुनै पनि कुरा लेख्नु । नेपालनाम्चा तपाईंको मिडिया साथी त हो । र, nepalnamcha@gmail.com यसको इमेल हो । यही इमेलमा आफ्नो परिचय, फोटोसहित आफ्ना मनका अनेक कुरा, सबै कुरा पठाउनुहोला । सम्पादक)